Bakı. Aqşin Əliyev - APA-Sport. Azərbaycan yığması XIII Pekin Yay Paralimpiya Oyunlarında bu gün daha 3 medal qazanıb. “APA-Sport”un məlumatına görə, fiziki qüsurlu idmançıların yarışında həmvətənlərimiz 1 qızıl və 2 gümüş medala layiq görülüblər. Fəxri kürsüyə yüksələnlərin hər üçü cüdoçu olub. Tofiq Məmmədov (90 kq) və Kərim Sərdarov (100 kq) yalnız finalda uduzaraq, gümüş medala yiyələniblər. 100 kq-dan artıq çəkidə mübarizə aparan İlham Zəkiyev isə növbəti dəfə paralimpiya çempionu olub. 28 yaşlı cüdoçu 4 il öncə Afinada olduğu kimi, yenə bütün rəqiblərinə qalib gəlib. Bununla da, 18 idmançıdan ibarət milli komandamızın aktivindəki medalların sayı 5-ə çatıb.
Paralimpiadanın ilk günündə cüdoçu Ramin İbrahimov (60 kq), eləcə də üçtəkanla tullanma yarışında Vladimir Zayets üçüncü yeri tutub. İndiyədək 1 qızıl, 2 gümüş, 2 bürünc mükafata sahib çıxmış Azərbaycan medal qazanan ölkələrin siyahısında 25-ci pilləyə qalxıb. Pekin Paralimpiadası sentyabrın 17-də başa çatacaq.
Qeyd edək ki, 2004-cü ildə Afinada Paralimpiasında qüvvəsini sınamış 11 idmançımız Vətənə 2 qızıl, 1 gümüş, 1 bürünc medalla dönmüşdü.

• Beynəlxalq triatlon yarışında ilk azərbaycanlı hakim - FOTO
• Gədəbəydə velosipedçilərlə görüş keçirilib - FOTO
• Əhməddin Rəcəblinin 80 illik yubileyi qeyd olunub
• Dövlət qurumlarının əməkdaşları arasında kamandan oxatma yarışı keçirilib - FOTO
• Yığma komandalarımız Gədəbəydə təlim-məşq toplanışında iştirak edəcək - FOTO