Rusiyanın Sankt-Peterburq şəhərində keçirilən taekvondo üzrə Avropa çempionatı davam edir. Apasport.az saytının məlumatına görə, yarışın ikinci günü də tatamiyə çıxan 4 idmançımız mükafatçılar sırasına düşə bilməyib.

Ziya Qasımov (63), Fariz Əliyev (68), Arzu Bağırova (53 kq) və Seunqmi Li (57 kq) keçirdikləri görüşlərdə məğlub olaraq, mübarizəni dayandırıblar.

13 taekvondoçu (8 kişi, 5 qadın) ilə təmsil olunduğumuz Avropa çempionatında bu gün daha 3 idmançımız qüvvəsini sınayacaq. Baş məşqçi Ələkbər İmaməliyevin böyük ümid bəslədiyi Elvin Məmmədov ikinci mərhələdə (74 kq) İqor Orlov (Moldova) və Juho Kostiainen (Finlandiya) cütünün qalibini sınağa çəkəcək. 80 kq çəki dərəcəsində mübarizə aparan Rəşad Əhmədovun zədələnməsindən sonra Rusiyaya aparılan İlkin Şahbazov da birinci döyüşdən azaddır. Avropa çempionumuz ikinci mərhələdə Nikolas Hamme (İspaniya) və Arman Yeremyan (Ermənistan) cütünün güclüsü ilə qarşılaşacaq.

Qadınlardan ibarət yığmamızın son nümayəndəsi Günay Ağakişiyeva (62 kq) komandamızın səfərdən əliboş dönməməsi üçün medal qazanmağa cəhd edəcək. Niyaməddin Paşayevin yetirməsi növbəti mərhələyə yüksəlmək üçün kipr Kriaki İoannounu məğlub etməlidir.

Qeyd edək ki, çempionatın birinci günündə Samir Aydınov (54), Vasif Qurbanov (58), Xəyalə Quliyeva (46 kq) və Aygül Abdullayeva (49 kq) mübarizəni dayandırmışdılar. Beləliklə, ilk 2 günündən sonra məğlub olan taekvondoçularımızın sayı 8-ə çatıb.

• Kırçın vadisindən “Bişkek Arena”ya: Köçəri irsin dünya səhnəsinə çıxışı – REPORTAJ
• Prezident İlham Əliyev və birinci xanım Mehriban Əliyeva Bişkekdə keçirilən 6-cı Dünya Köçəri Oyunlarının açılış mərasimində iştirak ediblər - CANLI - YENİLƏNİB
• Azərbaycan heyəti Dünya Köçəri Oyunlarında keçid edib - VİDEO
• Sona Ağayeva boccia üzrə dünya çempionatında bürünc medal qazanıb
• Timur Nikiforov Azərbaycan millisinə dəvət alıb