Nicat Şıxəlizadənin iştirakına rəsmən icazə verildi

21.04.2011 - 08:59

Cüdo üzrə Azərbaycan yığmasının 4 il müddətinə diskvalifikasiya edilmiş üzvü Nicat Şıxəlizadənin beynəlxalq yarışlarda iştirakına rəsmi icazə verilib. Apasport.az saytının məlumatına görə,
həmyerlimizin cəza müddəti aprelin 1-də başa çatsa da, Beynəlxalq Cüdo Federasiyası onun yarışlara qatılmasına Avropa çempionatının püşkatmasından öncə razılıq məktubu göndərib.

Nəticədə 48 aylıq fasilədən sonra Şıxəlizadə Türkiyədə keçiriləcək qitə birinciliyində tatamiyə çıxacaq. Onun ilk döyüşdə rəqibi isə rusiyalı Beslan Mudranov olacaq.

Xatırladaq ki, 2007-ci il iyulun 2-dən 9-dək Belarusun paytaxtı Minskdə keçirilmiş beynəlxalq təlim-məşq toplanışı zamanı Nicat Şıxəlizadədən götürülən dopinq-test müsbət nəticə vermişdi. Ümumdünya Antidopinq Agentliyinin (WADA) nümayəndələri tərəfindən aparılan analiz nəticəsində 60 kq çəkidə çıxış edən cüdoçumuzun orqanizmindən istifadəsi qadağan olunmuş fulosemid preparatı tapılmışdı. 2005-ci ildə gənclər arasında təşkil olunan Avropa çempionatında da dopinq-testdən keçə bilməyən Şıxəlizadə 1 il müddətinə cəzalandırılmışdı. İkinci dəfə eyni xoşagəlməz halla üzləşdiyi üçün idmançımız daha ağır cəzaya – 4 illik diskvalifikasiyaya məruz qalmışdı.