[b]DÇ-2018: Kosta-Rika

[b]DÇ-2018: Kosta-Rika – DOSYE[/b]

04.06.2018 - 13:58

Rusiyada keçiriləcək futbol üzrə XXI dünya çempionatının startına 10 gün qalır. Növbəti dosyemiz Kosta-Rika yığması haqqındadı.

Kosta-Rika

FIFA sıralaması: 25-ci yer

Dünya çempionatlarında iştirak sayı: 4 (1990, 2002, 2006, 2014)

Dünya çempionatlarında oyun sayı: 15 (5 qələbə, 4 heç-heçə, 6 məğlubiyyət)

Vurulan-buraxılan qol sayı: 17-23

Ən yaxşı nəticə: 1/4 final (2014)

Dünya çempionatlarında ən çox oyun keçirən kosta-rikalı futbolçular: Kristian Bolanyos, Maykl Umanya – hər ikisi 7 oyun

Dünya çempionatlarında ən çox qol vuran kosta-rikalı futbolçular: Ronald Qomes, Paulo Vançope – hər ikisi 3 qol

Dünya çempionatına gedən yol: Həlledici məqamlar

2016-cı il, noyabr

Trinidad və Tobaqo səfərində qazanılan qələbə (2:1), ardınca evdə ABŞ millisinin 4:0 hesabı ilə məğlub edilməsi – bütün bunlar yaxşı başlanğıcın müjdəçisi idi.

2017-ci il, mart

Meksika qarşısında alınan 0:2 hesablı məğlubiyyət və Hondurasla görüşdəki heç-heçə nəticəsində Kosta-Rika turnir cədvəlində ikinci pilləyə endi.

2017-ci il, sentyabr

Markos Urenyanın dublu sayəsində “qırmızı-göylər” ABŞ səfərində üç xal qazanırlar.

2017-ci il, oktyabr

Kosta-Rika ardıcıl ikinci dəfə dünya çempionatına vəsiqəni təmin edir. Ancaq son üç matçda komandanın qələbə üzünə həsrət qalması uğura kölgə salırdı.

Baş məşqçi

Oskar Ramires: 53 yaş (08.12.1964)

Oskar Ramires 2015-ci ilin oktyabrında – Paulo Vançope ilə yollar ayrıldıqdan sonra baş məşqçi postuna gətirilib. O, futbolçu kimi 1990-cı ildə keçirilən dünya çempionatında Kosta-Rika millisinin formasını geyinib. Karyerasını bitirdikdən sonra isə “Saprissa”da və yığma komandada texniki köməkçi kimi çalışıb. “Alaxuelense” onun rəhbərliyi altında 5 titul qazanıb.

Ulduz

Brayan Ruis: 32 yaş (18.08.1985)

32 yaşlı futbolçu təsnifat mərhələsində 3 dəfə rəqib qapılarına yol tapıb. İkinci hücumçu kimi də oynaya bilən hücumameylli yarımmüdafiəçi Brayan Ruisin Kosta-Rikanın DÇ-2014-də 1/4 finala yüksəlməsində də payı böyük idi. İlk dəfə 2005-ci ildə Çinlə oynanılan görüşdə debüt edən 32 yaşlı futbolçu bu müddət ərzində 101 matçda meydana çıxıb və 23 qol vurub.

Dünya çempionatına hazırlıq

Kosta-Rika yığması mundial hazırlıqları çərçivəsində 5 yoldaşlıq görüşü planlaşdırıb. Sözügedən oyunlardan artıq ikisi geridə qalıb. Şotlandiyaya qalib gələn (1:0) “qırmızı-göylər” Tunisə eyni hesabla məğlub olublar. Qarşıda Kosta-Rikanı Şimali İrlandiya, İngiltərə və Belçika ilə görüşlər gözləyir.

Dünya çempionatında

Kosta-Rika yığması DÇ-2018-dəki ilk görüşündə Serbiya ilə üz-üzə gələcək. Ardınca rəqib qrupun favoriti Braziliya olacaq. Nəhayət, qrup mərhələsinin sonuncu turunda Kosta-Rika İsveçrə ilə münasibətlərinə aydınlıq gətirəcək.

Qrup mərhələsi

E qrupu

I tur

16:00. Kosta-Rika – Serbiya

“Samara Arena”, Samara

II tur

16:00. Braziliya – Kosta-Rika

Sankt-Peterburq şəhər stadionu, Sankt-Peterburq

III tur

22:00. İsveçrə - Kosta-Rika

Nijni-Novqorod şəhər stadionu, Nijni-Novqorod

Yekun iştirak ərizəsi

Qapıçılar: Keylos Navas (“Real”), Patrik Pemberton (“Alaxuelense”), Leonel Moreyra (“Herediano”);

Müdafiəçilər: Kristian Qamboa (“Seltik”), Yan Smit (“Norrçöpinq”), Ronald Matarrita (“Nyu-York Siti”), Brayan Ovyedo (“Sanderlend”), Oskar Duarte (“Espanyol”), Cankarlo Qonsales (“Bolonya”), Fransisko Kalvo (“Minnesota Yunayted”), Kendall Uoston (“Vankuver Uaytkeps”), Conni Akosta (“Rionerqo Aqilas”);

Yarımmüdafiəçilər: David Qusman (“Portlend Timbers”), Yeltsin Texeda (“Lozanna”), Selso Borxes (“Deportivo”), Rendall Asofeyfa (“Erediano”), Rodni Uollas (“Nyu-York Siti”), Brayan Ruis (“Sportinq”), Daniel Kolindres, Kristian Bolanyos (“Deportivo Saprissa”);

Hücumçular: Yohan Veneqas (“Deportivo Saprissa”), Joel Kempbell (“Betis”), Marko Urena (“Los-Anceles”).