[b]DÇ-2018: Yaponiya

[b]DÇ-2018: Yaponiya - DOSYE[/b]

08.06.2018 - 16:44

Rusiyada keçiriləcək futbol üzrə XXI dünya çempionatının startına 6 gün qalır. Sonuncu dosyemiz Yaponiya millisi haqqındadı.

Yaponiya

FIFA sıralaması: 61-ci yer

Dünya çempionatlarında iştirak sayı: 5 (1998, 2002, 2006, 2010, 2014)

Dünya çempionatlarında oyun sayı: 17 (4 qələbə, 4 heç-heçə, 9 məğlubiyyət)

Vurulan-buraxılan qol sayı: 14-22

Ən yaxşı nəticə: 1/8 final (2002, 2010)

Dünya çempionatlarında ən çox oyun keçirən yaponiyalı futbolçu: Hidetosi Nakata – 10 oyun (1998, 2002, 2006)

Dünya çempionatlarında ən çox qol vuran yaponiyalı futbolçu: Keysuke Honda – 3 qol (2010, 2014)

Baş məşqçi

Akira Nisino: 63 yaş (07.04.1955)

Akira Nisino futbolçu kimi 1977-ci ildə Yaponiya millisinin heyətində dünya çempionatının 4 təsnifat matçında forma geyib. O, 2018-ci ilin aprelində yığmanın baş məşqçisi postunda Vahid Halilhodziçi əvəzləyib. 63 yaşlı mütəxəssis 1996-cı il Atlanta Yay Olimpiya Oyunlarında Yaponiya yığmasına rəhbərlik edib. Bununla yanaşı, Nisino “Qamba Osaka” ilə birlikdə Klublararası dünya çempionatının yarımfinalına qədər irəliləyə bilib.

Ulduz

Maya Yoşida: 29 yaş (24.08.1988)

Yoşida əsas yığmanın heyətində ilk dəfə 2010-cu ilin yanvarında Asiya kubokunun təsnifat mərhələsi çərçivəsində Yəmənlə oynanılan görüşdə debüt edib. 2012-ci ildən bəri Premyer Liqa klublarından “Sauthempton”un formasını geyən 29 yaşlı müdafiəçi millisinin son iki mundialda iştirak etməsində ən böyük pay sahibi olan futbolçulardan biridi.

Dünya çempionatına gedən yol: Həlledici məqamlar

2015-ci il, iyun

Yaponiya evdə Sinqapur qolsuz bərabərliyə razı olur. Buna baxmayaraq, “samuraylar” ikinci təsnifat mərhələsini digər bütün görüşlərdə qələbə qazanaraq, həm də qol buraxmadan lider kimi tamamlayırlar.

2016-cı il, sentyabr

Yaponiya əsas təsnifat mərhələsinin açılış matçında doğma meydanda BƏƏ-yə 1:2 hesabı ilə uduzur. Ancaq bu məğlubiyyətin ardından yaponların yüksəlişi başlayır.

2016-cı il, noyabr

Şübhəli penalti oyunun nəticəsini müəyyənləşdirir. Yaponiya qrupdakı əsas rəqiblərindən Səudiyyə Ərəbistanına qalib gəlir – 2:1.

2017-ci il, avqust

Avstraliya üzərində qazanılan 2:0 hesablı qələbə Yaponiyanın Rusiyaya “bilet” qazanması anlamına gəlirdi. Asiya təmsilçisi 8-ci cəhdində ilk dəfə təsnifat mərhələsində “kenqurular”ı məğlub etmişdi.

Dünya çempionatına hazırlıq

Yaponiya mundial hazırlıqları çərçivəsində bu günə kimi 3 yoxlama görüşü keçirib. Mali ilə 1:1 hesablı bərabərliyə razı olan “samuraylar” Ukrayna (1:2) və Qanaya (0:2) uduzub. İrəlidə İsveçrə və Paraqvayla oynanılacaq daha iki hazırlıq matçı planlaşdırılır.

Dünya çempionatında

Yaponiya mundialda Polşa, Kolumbiya və Seneqal yığmaları ilə birlikdə H qrupunda mübarizə aparacaq.

Qrup mərhələsi

H qrupu

I tur

19 iyun

16:00. Kolumbiya – Yaponiya

“Mordovia Arena”, Saransk

II tur

24 iyun

19:00. Yaponiya – Seneqal

“Yekaterinburq Arena”, Yekaterinburq

III tur

28 iyun

18:00. Yaponiya – Polşa

“Volqoqrad Arena”, Volqoqrad

Yekun iştirak ərizəsi

Qapıçılar: Eyi Kavasima ("Mets", Fransa), Masaaki Hiqasiquçi ("Qamba Osaka"), Kosuke Nakamura ("Kasiva");

Müdafiəçilər: Yuto Naqatomo ("Qalatasaray", Türkiyə), Götoku Sakai ("Hamburq", Almaniya), Tomoaki Makino ("Urava"), Qen Şoji, Naomisi Ueda (hər ikisi "Kaşima"), Vataru Endo ("Urava"), Maya Yoşida ("Sauthempton", İngiltərə), Hiroki Sakai ("Marsel", Fransa);

Yarımmüdafiəçilər: Makoto Hasebe ("Ayntraxt", Almaniya), Sindzi Kaqava ("Borussiya" D, Almaniya), Qaku Sibasaki ("Xetafe", İspaniya), Riota Osima ("Kavasaki"), Hotaru Yamaquçi ("Serezo Osaka"), Keysuke Honda ("Paçeko", Meksika), Qenki Xaraquçi ("Düsseldorf", Almaniya), Takaşi İnui (“Eybar", İspaniya), Takaşi Usami ("Düsseldorf", Almaniya);

Hücumçular: Sindzi Okadzaki ("Lester", İngiltərə), Yoşinori Muto ("Maynts", Almaniya), Yuya Osako (“Köln”, Almaniya).