Misli Premyer Liqasının III turu çərçivəsində “Turan Tovuz” səfərdə “Neftçi”ni 1:0 hesabı ilə məğlub edib.
Apasport.az xəbər verir ki, ev sahiblərinin baş məşqçisi Samir Abasov oyundan sonra keçirilən mətbuat konfransında jurnalistlərin suallarını cavablandırıb.
– Komandanız niyə qol vura bilmir?
– Epizodlar yaratdıq, təəssüf ki, bəxtimiz gətirmir. Əvvəlki matçlarda da belə olmuşdu. Digər oyunlarla müqayisədə bu gün fərqli “Neftçi” var idi – çox ritmli və dinamik. İlk dəqiqədən komandanın niyyəti bəlli idi. Qol buraxdıqdan sonra da təzyiqi davam etdirdik. Futbolçular qalib gəlmək üçün çox istəkli idilər. İkinci hissədə qırmızı vərəqə planlarımızı pozdu. 10 nəfərlə qaldıqdan sonra müdafiəçilər soyuqqanlı və məharətlə oynadılar. Qapımızda epizod görmədən uduzduq. Futbolçulara istəklərinə və dinamikanın qorunmasına görə təşəkkür edirəm. Səhvlər olacaq, tələskənlikdən irəli gələn səhvlər də olacaq. Amma bu komandanın yaxşı işlər görməyə qadir olduğunu gördüm.
– Erkən qol planlarınızı nə qədər pozdu? Buraxılan qolda qapıçınızın səhvi var idi. Onu cəza gözləyir?
– Rəqibə epizod vermirdik, bu da üzərində çox dayandığımız məqam idi. Amma reallıqdır ki, qapıçının səhvi var. Bununla belə, bir səhvə görə onu kənara atmaq istəmirəm. Kənanın yanındayıq. İnanıram ki, təcrübəsi və əvvəlki performansını burada da göstərəcək. Hazırda işimiz oyunçu cəzalandırmaq deyil.
– Piriç Superliqada 34 oyuna 67 qol buraxıb. Bu mövsümdə də hər iki görüşdə səhvləri oldu. Növbəti matçlarda da xalların itirilməsi mümkündürmü?
– Biz belə düşünmürük. Mən də istəmirəm ki, ayrı-ayrı futbolçuların üzərində dayanım. Hər kəs səhv edə bilər. Əsas odur ki, futbolçunu qoruyaq. Necə ki, biz bunu edirik. Superliqadan qapıçı gətirmək asan deyil, amma “Neftçi” bunu bacardı.
– İndiki məqamda sizi nə məmnun edir?
– Bugünkü oyun bizim üçün həm siqnal, həm də ümiddir. Bəhanə gətirmirəm. Birinci hissədə çıxış edən oyunçuların performansında müəyyən əskikliklər var idi. Amma bu komanda çox yaxşı işlər görəcək. Yetərincə keyfiyyətli futbolçularımız var. Sadəcə xal itirdikdən sonra bunları demək çətin olur. Komandama inanıram.
– Qırmızı vərəqə və Sambunun epizodlarını nəzərə alsaq, Əliyar Ağayev işinin öhdəsindən gəldi?
– Onun hansı səviyyəli hakim olduğu hamıya bəllidir. Amma bu gün idarəçilikdən narazı qaldım. Penalti epizodunu indi izah edə bilmirəm. Rəqibə ikinci sarı vərəqə də verilə bilərdi. Məncə, bir tərəfə simpatiya daha çox idi. Heç xoşuma gəlmədi. Bizim əsəblərimizlə oynadılar. Qırmızı vərəqə haqlı idi? Rəqib bizi təxribata çəkdi. Ribeyronun cavab vermək ixtiyarı yox idi. Əgər Əliyar görüb qərar veribsə, yanındayam. Amma digər qərarlardan narazıyam. Özümüzü ev komandası kimi hiss etmədik, bu, çox pis idi.
– “Neftçi”nin xal itkiləri davam edir. Qorxmursunuz ki, istefanıza səbəb ola bilər?
– Ola bilər. Bu futboldur.
– “Qarabağ”ı təbrik etməməkdə sizi qınayırlar. Azarkeşlər də narazıdır…
– Təbrik etsəm, rəqib komandaya simpatiya göstərmiş kimi qəbul ediləcək. Nə isə… Bütün məşqçilər təbrik edib? Təbrik edənlər arasında mən yox idim. İndi deyirəm: “Qarabağ”ı təbrik edirəm.
– “Turan Tovuz” daha çox hücum futbolu oynayır. Bəlkə taktiki sxem düzgün deyil, ya da futbolçuların səviyyəsi kifayət etmir?
– Bu, şəxsi fikirdir. Hörmətlə yanaşıram, amma qəbul etmirəm. Futbolçularımın səviyyəsini müzakirə etməyə imkan vermərəm. Onlar yaxşı səviyyədədirlər. Bu gün də eyni ssenari davam edirdi, sadəcə rəqib qapalı oynadı.
– Komandanız niyə asmalardan az istifadə edir?
– Sako yüksək səviyyədə oynadı, onun öz oyun üslubu var. Rəqibin isə üç hündürboy müdafiəçisi var idi. Belə olan halda, havaya asmalar etmək fayda vermir. Bu, sırf oyun üslubundan irəli gələn məsələdir.
Oxşar xəbərlər
Ana səhifə
Bütün xəbərlər