Azərbaycan şahmatçısı Vüqar Həşimov Rusiyanın Xantı-Mansiysk şəhərində keçirilən Dünya Kubokunda maraqlı hadisə ilə üzləşib. Apasport.az saytının məlumatına görə, 23 yaşlı həmyerlimiz yarışın 1/16 finalında çinli rəqibi Li Çaonu texniki qələbə nəticəsində üstələyib.

Belə ki, tərəflər arasında ilk iki oyun heç-heçə nəticələndiyindən, qalib tay-breykdə müəyyənləşməli idi. Tay-breyk zamanı isə Li siqaretin güdazına gedib. O, həmyerlisi Van Yue ilə birgə foyeyə siqaret çəkməyə çıxıb. Lakin onların başı qarışdığından, oyuna 2 dəqiqə yubanıblar. Qaydalara əsasən, hər iki şahmatçı Dünya Kubokundan uzaqlaşdırılıb. Bununla da, Vüqar Həşimov və Yue ilə üz-üzə gələn Etyen Bakro (Fransa) 1/8 finala yüksəlib.

Yarışın sensasiyası kimi qiymətləndirilən sözügedən hadisə barədə Van Yue bunları deyib: “Biz dayanıb, siqaret çəkirdik. Birdən yanımızdan keçən bir oğlan dedi ki, “uşaqlar, məncə, siz oyuna yubanmısınız”. Özümüzü zala atdıq, ancaq gec idi. Fikrimizcə, təşkilatçılar düzgün qərar çıxarıblar. Ancaq bir məqamı nəzərə almaq lazımdır ki, Çində belə böyük turnirlər keçirilərkən, foyedə ekranlar quraşdırılır və bunun sayəsində zalı görmək mümkün olur”.

“Bu uğursuzluqdan sonra nə etmək fikrindəsiniz” sualına çinli şahmatçılar özlərinə məxsus cavab veriblər. Van Yue növbəti gün baş tutacaq uçuşa hazırlaşacaqlarını deyib. Həşimovun rəqibi olmuş Li isə zarafatından qalmayıb: “Mən isə gedirəm yarışın əsasnaməsini oxumağa!”.

• Kırçın vadisindən “Bişkek Arena”ya: Köçəri irsin dünya səhnəsinə çıxışı – REPORTAJ
• Prezident İlham Əliyev və birinci xanım Mehriban Əliyeva Bişkekdə keçirilən 6-cı Dünya Köçəri Oyunlarının açılış mərasimində iştirak ediblər - CANLI - YENİLƏNİB
• Azərbaycan heyəti Dünya Köçəri Oyunlarında keçid edib - VİDEO
• Sona Ağayeva boccia üzrə dünya çempionatında bürünc medal qazanıb
• Timur Nikiforov Azərbaycan millisinə dəvət alıb