Bu gün güləş üzrə Avropa çempionatına start verilib.
Apasport.az xəbər verir ki, Slovakiyanın paytaxtı Bratislavadakı yarışın ilk günündə sərbəst güləşçilər xalça üzərinə çıxıblar.
Beş çəki dərəcəsində təsnifat görüşləri baş tutub. Azərbaycan millisinin 5 güləşçisi yarışa start verib. Onlardan üçü yarımfinala yüksəlib.
Sərbəst güləş
57 kq
İslam Bazarqanov yarışa 1/4 finaldan başlayıb. O, türkiyəli Muhammet Karavuşa 8:1 hesabıyla qalib gələrək yarımfinala vəsiqə qazanıb. İslam finalın bir addımlığında Naçın Monquş (UWW) ilə qarşılaşıb. 0:5 hesabı ilə uduzan güləşçimiz sabah bürünc uğrunda mübarizə aparacaq.
65 kq
Əli Rəhimzadə 1/8 finalda belçikalı Ayub Musayevlə qarşılaşıb. 7:2 hesabıyla qalib gələn güləşçimiz 1/4 finala yüksəlib. Növbəti görüşdə almaniyalı Niko Meqerleyə tam üstünlüklə (10:0) qalib gələn idmançımız yarımfinala adlayıb. Onun növbəti rəqibi fransalı Xamzat Arsamerzoyev olub. Təmsilçimiz 3:4 hesabı ilə uduzaraq, qızıl şansını itirib. Əli bürünc uğrunda görüşəcək.
70 kq
Kənan Heybətov təsnifat mərhələsində avstriyalı Benedikt Huberlə görüşüb. O, tam üstünlüklə (10:0) qalib gələrək 1/4 finala adlayıb. O, yarımfinala vəsiqə uğrunda qarşılaşmada bolqarıstanlı Mihail Georgiyevə 4:1 hesabıyla qalib gəlib. Heybətov bu mərhələdə David Bayevlə (UWW) görüşüb və 0:3 hesabı ilə uduzub.
79 kq
Orxan Abasov təsnifat mərhələsində fransalı Zelimxan Xadjiyevlə üz-üzə gəlib. O, 5:9 hesabıyla məğlub olub.
97 kq
Abubakr Abakarov təsnifat mərhələsində ukraynalı Vasil Sova ilə görüşüb. "Tuş"la (9:5) qalib gələn idmançımız 1/4 finala yüksəlib. O, bu mərhələdə macarıstanlı Riçard Veqə 2:5 hesabı ilə uduzub.
Qeyd edək ki, “X-Bionic” İdman Kompleksində keçiriləcək qitə birinciliyinin görüşləri hər gün Bakı vaxtı ilə saat 12:30-da start götürəcək. Yarımfinallar 18:45-də, medallar uğrunda qarşılaşmalar isə 20:00-da başlayacaq.
Oxşar xəbərlər
Ana səhifə
Bütün xəbərlər