Futbol üzrə Azərbaycan çempionatının I Liqasının “Baku Sporting” - “Qəbələ” matçından (0:5) sonra qonaqların baş məşqçisi Kaxaber Sxadadze jurnalistlərə müsahibə verib.
- “Qəbələ” I Liqaya düşərkən klubu tərk etmədiz, sona qədər mübarizə apardız. Bu gün də komanda yenidən Premyer Liqaya qayıtdı. Təəssüratlarınız necədir?
- Keçən il çox çətin dövr yaşadıq, komanda I Liqaya düşdü. Həm klubun prezidenti Fariz Nəcəfov, həm də idman direktoru Səbuhi Səfiyarlı ilə yaxşı münasibətlərim vardı. Hər ikisi ilə müzakirələr apardıq. Qərara alındı ki, biz komandadakı işimizə davam edək və “Qəbələ” yenidən Premyer Liqaya qayıtsın. Bu barədə köməkçim Giorgi Çixradze ilə də danışdım, məsləhətləşdim. Nəticə etibarilə burda qalmağı qərara aldıq. Bilirdik ki, I Liqada meydançaların vəziyyətləri ideal deyil, bəzi stadionlarda çatışmazlıqlar var, qaldığımız otellər yüksək səviyyəli olmayacaq. Bunlara baxmayaraq, qarşımıza məqsəd qoyduq və bu yolda mübarizə apardıq. Üstəlik, keçən mövsümkü heyətin əsas üzvləri komandanı tərk etmişdi. Bəzi insanlar düşünürdülər ki, “Qəbələ” klubu dağılacaq. Amma bu, belə olmadı. Rəhbərliklə birlikdə yeni futbolçular gətirdik, komanda qurduq. Məşqçilər nə qədər yüksək səviyyəli olsa da, futbolçularsız heç nə etmək mümkün deyil. Bu səbəbdən bütün oyunçularıma təşəkkür edirəm. Uğurda onları rolu böyük oldu. Çox sevinirəm ki, Premyer Liqaya qayıdışın təməlini qoyduq. Ən sevindiyim məqam, verdiyim sözü tuta bilməyim oldu. Komandanı yenidən Premyer Liqaya qaytaracağıma söz vermişdim, bu gün həmin sözümü reallaşdıra bildik.
- Artıq Premyer Liqa üçün heyət qurulmalıdır. Transfer işlərinə indidən başlamısız? Hazırkı heyətdən kimləri komandada saxlayacağınıza qərar vermisiz?
- Düzünü desəm, bu günə qədərki məqsədimiz Premyer Liqaya yüksəlmək idi. Buna da bu gün nail olduq. Hələ ki, başqa heç nə barədə düşünməmişik. Gözləyirdik ki, qayıdışımız dəqiqləşsin. Klubumuz Avropa səviyyəsində idarə olunur. Transfer işləri ilə idman direktorumuz məşğul olur, çalışır ki, heyətə səviyyəli oyunçular gətirsin. Futbolçuları izləyirik, seçimlər edirik. Bu il qurduğumuz komanda çox yaxşı çıxış etdi. Bu, gələn mövsümün komandasının onurğa sütunu olacaq. Həmişə güclənmək lazımdır. Hətta “Qarabağ” kimi komanda üçün də bu, önəmlidir. Heyətin əsasını qorumaqla, güclənməyə çalışacağıq.
- I Liqadakı şərtlər Premyer Liqadan daha çətindir. Özünüzün də qeyd etdiyiniz kimi, meydançaların vəziyyəti ideal deyil. Komandanın bura qədər məğlubiyyətsiz gələcəyini gözləyirdiz?
- Çalışırdıq ki, mövsümü məğlubiyyətsiz bitirək. Hələ də çalışırıq (gülür). Sezon hələ bitməyib. Məqsədimiz çempion olmaqdır. Əsas tapşırıq bu yöndədir. Bütün rəqiblərimizə hörmət edirik. Hər biri də bizə qarşı layiqli mübarizə aparırlar.
- Şahin Şahniyarovun millidəki çıxışını necə dəyərləndirirsiz?
- Onun yığmaya çağırılmasına çox sevinmişdim. Burda təbii ki, Şahinin özünün rolu böyükdür. Onun uğurunda həm də məşqçilərinin köməyi olub. Şahniyarovla fəxr edirəm. Özünə də demişəm ki, ora gedib çıxmaq bir uğurdur. Əsası orda qalmaqdır ki, çətini də budur.
- Gürcüstan millisi ilə Azərbaycan yığmasını necə müqayisə edərdiz?
- Gürcüstan millisi hazırda yüksəlişdədir. Komanda Millətlər Liqasında B divizionuna vəsiqə qazandı. Azərbaycan yığması isə enişdədir. Belə hallar futbolda normaldır. Bizim ölkədə də belə şeylər yaşanıb. Futbolçularımız xarici klublarda çıxış etsələr də, bu, təsirini göstərmirdi. Lakin indi həmin uğuru görmək mümkündür. Yığmanın uğuru üçün infrastruktur və kütləvilik olmalıdır. Yaxşı futbolçular seçilməlidir və onların arasında rəqabət yaranmalıdır.
- Sizcə, yığmanın uğursuzluğunda meydançaların təbii örtüklü olmaması nə dərəcə rol oynayır?
- Təbii ki, infrastruktur yüksək səviyyədə olmalıdır. Meydançadan meydançaya da fərq var. Bu günkü meydança süni örtüklü olsa da, mükəmməldir. Başqa komandaların da stadionlarında vəziyyət belə olsa, əla olar. Bu gün yaxşı şəraitdə, gözəl oyun nümayiş etdirdik.
İsmayıl Xeyrullayev
Oxşar xəbərlər
Ana səhifə
Bütün xəbərlər