Azərbaycanlı məşqçi Qəzənfər Abbasov “Apasport”a müsahibə verib.
— “Sabah” - “Slaviya” görüşündən gözləntiləriniz nələrdir?
— Bu oyun Azərbaycan təmsilçisi üçün həm ciddi sınaq, həm də potensialını nümayiş etdirmək baxımından əla fürsətdir. "Slaviya" Avropa futbolunda müəyyən təcrübəsi olan, yüksək templə oynayan və rəqibi aqressiv pressinqlə sıxışdıran komandadır. Komandamız qarşıdakı matçda ilk növbədə öz meydan amilindən və azarkeş dəstəyindən maksimum səviyyədə yararlanmalıdır.
— Rəqibin əsas təhlükəli cəhətləri hansılardır və onlara qarşı necə oynamalıyıq?
— "Slaviya"nın əsas üstünlükləri yüksək oyun tempi, aqressiv pressinq və cinahlardan təşkil etdiyi sürətli hücumlardır. Eyni zamanda, onlar da əsasən əks-hücumlarda çox təhlükəli olurlar. Buna görə də rəqibə qarşı topitkilərini minimuma endirmək lazımdır. Müdafiədə son dərəcə kompakt oynamalı, mərkəz zonasında rəqibə üstünlük qazanmağa imkan verməməliyik.
— Hücum xəttində hansı nüanslara diqqət yetirilməlidir?
— Topu ələ keçirdikdən sonra sürətli hücumlara keçmək vacib şərtlərdəndir. Ən yaxşı üstünlüklərimizdən biri məhz topu qazandıqdan sonra əks-hücumları keyfiyyətli qurmaq olmalıdır. Top itkisindən dərhal sonra tez bir zamanda düzgün mövqe tutmalı və rəqibin müdafiə arxasında yaratdığı boşluqlardan maksimum yararlanmalıyıq.
— Qarşılaşma üçün hesab proqnozunuz var?
— Belə səviyyəli oyunlarda dəqiq nəticə proqnozlaşdırmaq çətindir, lakin rəqibin təcrübəsini və komandamızın imkanlarını nəzərə alsaq, qarşılaşmanın 1–1 hesablı bərabərliklə və ya hər iki komandanın qol vuracağı nəticə ilə başa çatacağını ehtimal edirəm. Əgər komandamız intizamlı oynasa, rəqibin güclü cəhətlərini məhdudlaşdıra və qol imkanlarından sərrast istifadə edə bilərsə, müsbət nəticə əldə etmək mümkündür.
— Sonda azarkeşlərə nə deyə bilərsiniz?
— Bu cür oyunlarda azarkeş dəstəyi həlledici rol oynayır. Futbolçular sona qədər mübarizə aparmalı, meydanda xarakter göstərməli və komanda intizamına sadiq qalmalıdırlar. Çünki belə matçlar təkcə bu oyunla məhdudlaşmır. Avropanın daha güclü klublarına qarşı mübarizə aparmaq həm komandanın inkişafı, həm də futbolçuların təcrübə qazanması baxımından böyük əhəmiyyət daşıyır. Komandamıza bu matçda uğurlar arzulayıram, inşallah, qələbə bizim olar.
Oxşar xəbərlər
Ana səhifə
Bütün xəbərlər