Maltanın paytaxtı Vallettada yeniyetmə taekvondoçular arasında Avropa birinciliyində 3 qızıl, 2 gümüş və 3 bürünc medal qazanan Azərbaycan yığması Bakıya qayıdıb. 

Apasport.az saytının məlumatına görə, son 15 ilin rekordunu vuran yığmamızı Heydər Əliyev Beynəlxalq Hava Limanında Azərbaycan Taekvondo Federasiyasının və Gənclər və İdman Nazirliyinin əməkdaşları, idman ictimaiyyətinin nümayəndələri, idmançıların yaxınları və taekvondosevərlər qarşılayıblar. 

Azərbaycan millisinin baş məşqçisi Rəşad Məmmədov bildirib ki, komandası Vallettada layiqli çıxış edib: “Yarışa çox yaxşı hazırlaşmışdıq. Təlim-məşq toplanışımız faydalı oldu və bu, Avropa birinciliyində 8 medal qazanmağımızla nəticələndi. Uşaqlar özlərini doğrultdular. Məqsədimiz növbəti yarışlarda da uğurlu çıxışdır”.

Qeyd edək ki, Vallettada Zəhra İsayeva (29 kq), İlyas Hətəmli (37 kq), Vasif Səlimov (53 kq) qızıl, Xuraman Cavadzadə (37 kq), Elcan Əliyev (65 kq) gümüş, Mehdi Budaqlı (33 kq), Fuad Məhərrəmli (45 kq) və Bahadur Dostuyev (49 kq) bürünc medal qazanıb. Milli 8 medalla həm oğlanların, həm də ümumu komanda hesabında Avropanın 3-cüsü olub.
 

• Parapauerliftinqçilərimiz Avropa Açıq çempionatında 12 medal qazanıb
• Azərbaycan İdman Akademiyası INTI Beynəlxalq Universiteti ilə memorandum imzalayıb
• ASA-nın rektoru: “Qazilərin bərpa prosesinə töhfə verən layihədir”
• Avstriyalı mütəxəssis: “Azərbaycanla əməkdaşlığımızı daha da genişləndirmək istəyirik”
• ASA-nın nəşr etdiyi “Təməldən təfərrüata” kitabının təqdimat mərasimi keçirilib